रौतहट । “भ्रष्टाचारविरुद्धको अभियान ! यसपालि मोबाइलमा मतदान !!” भन्ने नारासहित आम जनता पार्टी (आजपा) ले रौतहट क्षेत्र नम्बर–२ अन्तर्गत तेजापाकड बजारमा विशेष क्षेत्रीय भेला सम्पन्न गरेको छ। आजपा उपाध्यक्ष एलिजा गौतमको विशेष उपस्थितिमा सम्पन्न उक्त भेलाले निर्वाचन परिचालनसँग सम्बन्धित महत्वपूर्ण निर्णयहरू गरेको छ।
भेलामा आगामी निर्वाचनलाई लक्षित गर्दै संगठन विस्तार, जनसम्पर्क अभियान, मतदाता परिचालन र प्रविधिमैत्री मतदान प्रणालीको विषयमा व्यापक छलफल गरिएको थियो। विशेषगरी मोबाइलमार्फत मतदानको अवधारणाले भेलामा सहभागी कार्यकर्ता तथा स्थानीय जनताबीच उत्साह थपेको देखिएको थियो।
एलिजा गौतमको राजनीतिक प्रवेशले मधेशमा तरंग
नेपाली ग्ल्यामर क्षेत्रकी चर्चित व्यक्तित्व तथा समाजसेवी एलिजा गौतम आम जनता पार्टीबाट समानुपातिक उम्मेदवारका रूपमा सक्रिय राजनीतिमा प्रवेश गरेसँगै उनी ‘आयरन लेडी’ को रूपमा चर्चामा आउन थालेकी छन्। मधेशको मुटु मानिने रौतहट पुगेर उनले भ्रष्टाचारविरुद्ध कडा आवाज उठाउँदै जनमुखी राजनीति गर्ने प्रतिबद्धता व्यक्त गरिन्।
भेलालाई सम्बोधन गर्दै उपाध्यक्ष गौतमले भनिन्,
“राजनीति अब केही व्यक्तिको स्वार्थका लागि होइन, आम नागरिकको अधिकार र इमानदार शासनका लागि हुनुपर्छ। आजपा भ्रष्टाचारविरुद्धको अभियानलाई आन्दोलनकै रूपमा अगाडि बढाउनेछ।”
जनताको सहभागितामा जोड
उनले प्रविधिको प्रयोगमार्फत पारदर्शी, सहज र सुरक्षित मतदान प्रणाली लागू गर्नुपर्नेमा जोड दिँदै मोबाइल भोटिङ अवधारणाले युवालाई राजनीतिमा आकर्षित गर्ने विश्वास व्यक्त गरिन्। साथै, मधेशका समस्या, बेरोजगारी, शिक्षा र स्वास्थ्यजस्ता मुद्दा आजपाको प्राथमिकतामा रहने स्पष्ट पारिन्।
संगठन सुदृढीकरणका निर्णय
भेलाले रौतहट–२ मा पार्टीको संगठन सुदृढ बनाउने, वडा तहसम्म निर्वाचन परिचालन समिति गठन गर्ने तथा घरदैलो अभियान तीव्र बनाउने निर्णय गरेको छ। स्थानीय कार्यकर्ताहरूले आजपाको नारा र एजेन्डाले जनतामा आशा जगाएको प्रतिक्रिया दिएका छन्।
आजपाको यो क्षेत्रीय भेलासँगै रौतहटको राजनीतिक माहोल थप तातिएको छ। एलिजा गौतमको सक्रियता र नयाँ शैलीको राजनीतिक प्रस्तुतिले मधेशको राजनीतिमा नयाँ बहस र प्रतिस्पर्धा सुरु भएको विश्लेषण गरिँदैछ।
