प्रधानमन्त्री वालेन्द्र शाहको प्रमुख आतिथ्यमा ७९ प्रहरी निरीक्षक दीक्षित, कानुनको पालना र निष्पक्षतामा जोड
द टन न्युज । काठमाडौं ।
सम्माननीय प्रधानमन्त्री वालेन्द्र शाहको प्रमुख आतिथ्यमा राष्ट्रिय प्रहरी प्रशिक्षण प्रतिष्ठानमा सञ्चालित प्रहरी निरीक्षक आधारभूत तालिम १–१८४औँ समूहको दीक्षान्त समारोह सम्पन्न भएको छ। १६ महिने कठिन तथा व्यावसायिक तालिम सफलतापूर्वक पूरा गरेका ७९ जना प्रशिक्षार्थी प्रहरी निरीक्षक दीक्षित भएका छन्।
दीक्षान्त समारोहलाई सम्बोधन गर्दै प्रधानमन्त्री शाहले नवदीक्षित प्रहरी निरीक्षकहरूलाई बधाई तथा सफल कार्यकालको शुभकामना व्यक्त गर्नुभयो। उहाँले प्रहरी सेवाको मूल मर्म कानुनको पालना, निष्पक्षता, व्यावसायिकता र नागरिकको विश्वास भएको उल्लेख गर्दै यी मूल्यलाई केन्द्रमा राखेर जिम्मेवारी निर्वाह गर्न निर्देशन दिनुभयो।
प्रधानमन्त्री शाहले प्रहरी संगठनप्रति नागरिकको भरोसा कायम राख्न कानुनको निष्पक्ष कार्यान्वयन, जिम्मेवार व्यवहार र कर्तव्यनिष्ठ सेवा अत्यन्त महत्त्वपूर्ण रहेको सन्देश दिनुभयो। प्रहरी अधिकारीहरूले पद र अधिकारलाई व्यक्तिगत स्वार्थभन्दा माथि राख्दै संविधान तथा प्रचलित कानुनअनुसार जनताको सेवामा समर्पित हुनुपर्ने अपेक्षा गरिएको छ।
१६ महिनाको कठोर प्रशिक्षण पूरा गरी सेवामा प्रवेश गर्न लागेका नवदीक्षित प्रहरी निरीक्षकहरूका लागि यो समारोह केवल तालिम समापन मात्र नभई राष्ट्र र नागरिकप्रतिको जिम्मेवारी स्वीकार गर्ने महत्त्वपूर्ण अवसरसमेत बनेको छ। उनीहरूको कार्यक्षमता, अनुशासन, इमानदारी र निर्णय क्षमताले आगामी दिनमा प्रहरी सेवाको प्रभावकारिता र सार्वजनिक विश्वास अभिवृद्धि गर्न महत्त्वपूर्ण भूमिका खेल्ने अपेक्षा गरिएको छ।
कार्यक्रममा प्रहरी महानिरीक्षक दानबहादुर कार्कीले प्रधानमन्त्री शाहलगायत उपस्थित विशिष्ट अतिथि तथा नवदीक्षित प्रहरी निरीक्षकहरूका परिवारजनलाई स्वागत गर्नुभएको थियो।
समारोहमा पूर्वमन्त्रीहरू, नेपाल सरकारका मुख्यसचिव, सर्वोच्च अदालतका मुख्य रजिस्ट्रार, नायब महान्यायाधिवक्ता, नेपाली सेनाका रथी, सशस्त्र प्रहरी महानिरीक्षक, राष्ट्रिय अनुसन्धान विभागका मुख्य अनुसन्धान निर्देशक, अन्य विशिष्ट व्यक्तित्व तथा नवदीक्षित प्रहरी निरीक्षकहरूका परिवारजनको उपस्थिति रहेको थियो।
राष्ट्रको शान्ति सुरक्षा कायम राख्ने, अपराध नियन्त्रण गर्ने, कानुन कार्यान्वयन गर्ने र नागरिकको जीवन तथा सम्पत्तिको सुरक्षा गर्ने महत्त्वपूर्ण जिम्मेवारी अब नवदीक्षित प्रहरी निरीक्षकहरूको काँधमा थपिएको छ।
नागरिकमैत्री प्रहरी सेवा, निष्पक्ष कार्यसम्पादन र जवाफदेहितामार्फत उनीहरूले संगठनको गरिमा उकास्दै जनविश्वासलाई अझ सुदृढ बनाउने अपेक्षा गरिएको छ।
द टन न्युज
Accuracy, Balance and Credibility
