कांग्रेसको १५औँ महाधिवेशनमा रबिना थापाको केन्द्रीय सदस्यमा उम्मेदवारी
महिला सहभागिता, डायस्पोरा, युवा, आर्थिक विकास र प्रवासी नेपालीका अधिकारलाई प्राथमिकतामा राख्ने प्रतिबद्धता
द टन न्युज । विशेष रिपोर्ट
काठमाडौं । गैरआवासीय नेपाली संघ (एनआरएनए) की पूर्व अध्यक्ष तथा समाजसेवी रबिना थापाले नेपाली कांग्रेसको १५औँ महाधिवेशनमा केन्द्रीय सदस्य (महिला तर्फ) पदमा उम्मेदवारी घोषणा गरेकी छन्।
नेपाली जनसम्पर्क समितिबाट केन्द्रीय सदस्य (महिला तर्फ) उम्मेदवार बन्ने घोषणा गर्दै थापाले लोकतन्त्र, समावेशिता, महिला तथा युवा सहभागिता, प्रवासी नेपालीको हकहित, आर्थिक विकास र समृद्धिलाई आफ्नो राजनीतिक यात्राका प्राथमिक विषयका रूपमा अघि सारेकी छन्।
थापाले लामो समयदेखि गैरआवासीय नेपाली अभियान, सामाजिक सेवा, महिला सशक्तीकरण तथा नेपाली डायस्पोरासँग सम्बन्धित विषयमा काम गर्दै आएको अनुभवलाई अब नेपाली कांग्रेसको संगठन र नीतिनिर्माण प्रक्रियासँग जोड्न चाहेको बताएकी छन्।
उनले विश्वभर रहेका नेपालीहरूले आर्जन गरेको ज्ञान, सीप, अनुभव, प्रविधि र पूँजीलाई नेपालको विकास तथा आर्थिक रूपान्तरणसँग जोड्नुपर्ने धारणा राखेकी छन्।
डायस्पोराका मुद्दा नीतिनिर्माणमा पुर्याउने प्रतिबद्धता
थापाले विदेशमा रहेका नेपाली तथा भावी पुस्ताको नेपालसँगको सम्बन्धलाई थप मजबुत बनाउँदै उनीहरूको हक, अधिकार र मातृभूमिप्रतिको अपनत्वलाई संस्थागत रूपमा सम्बोधन गर्नुपर्ने बताएकी छन्।
गैरआवासीय नेपाली नागरिकता तथा अधिकारसँग सम्बन्धित विषयलाई समेत नीतिगत र राजनीतिक तहबाट प्रभावकारी रूपमा अगाडि बढाउनुपर्ने उनको धारणा छ।
“विदेशमा रहेका नेपालीहरूको हकहितको संरक्षण गर्दै उनीहरूले आर्जन गरेको ज्ञान, सीप, अनुभव र पूँजीलाई नेपालको विकासमा कसरी जोड्न सकिन्छ भन्ने विषय मेरो प्रमुख प्राथमिकतामध्ये एक हो,” थापाले भनेकी छन्।
उनका अनुसार डायस्पोरामा बसेर आवाज उठाउनु मात्र पर्याप्त नभई ती विषयलाई राज्यको नीति निर्माण तहसम्म प्रभावकारी रूपमा पुर्याउन राजनीतिक सहभागिता आवश्यक छ।
महिला र युवाको अर्थपूर्ण सहभागितामा जोड
थापाले नेपाली कांग्रेसभित्र महिला तथा युवाको राजनीतिक सहभागिता बढाउनुपर्नेमा जोड दिएकी छन्।
उनको धारणा अनुसार नेतृत्वमा महिलाको उपस्थिति संख्यात्मक प्रतिनिधित्वमा मात्र सीमित हुनुहुँदैन; महिलाको सहभागिता निर्णय प्रक्रिया, नीति निर्माण र कार्यान्वयन तहमा समेत प्रभावकारी हुन आवश्यक छ।
त्यस्तै युवाको ऊर्जा, क्षमता र नयाँ सोचलाई पार्टीको संगठन तथा राष्ट्रिय नीति निर्माणसँग जोड्नुपर्ने उनले बताएकी छन्।
आर्थिक समृद्धि र लगानीमा प्राथमिकता
थापाले नेपालको अबको प्रमुख एजेन्डा आर्थिक समृद्धि र आर्थिक रूपान्तरण हुनुपर्ने बताउँदै स्वदेशमै रोजगारी तथा उद्यमशीलताको अवसर सिर्जना गर्ने, लगानीमैत्री वातावरण बनाउने र विदेशमा रहेका नेपालीको पूँजी तथा सीपलाई नेपालमा उपयोग गर्ने नीति आवश्यक रहेको उल्लेख गरेकी छन्।
“हाम्रो लक्ष्य देशलाई समृद्ध बनाउने मात्र होइन, प्रत्येक नेपाली नागरिकले समृद्धिको अनुभूति गर्न सक्ने वातावरण निर्माण गर्नु हो,” उनले भनेकी छन्।
कांग्रेसको डायस्पोरा सञ्जाललाई थप प्रभावकारी बनाउने लक्ष्य
नेपाली जनसम्पर्क समिति तथा प्रवासी नेपाली समुदायसँग लामो समयदेखि जोडिएकी थापाले विदेशमा रहेका नेपाली र मातृभूमिबीचको सम्बन्धलाई थप सुदृढ बनाउने विषयलाई आफ्नो राजनीतिक यात्राको महत्वपूर्ण आधार बनाएकी छन्।
उनले कांग्रेसको डायस्पोरा सञ्जाललाई थप व्यवस्थित र प्रभावकारी बनाउँदै विदेशमा रहेका नेपालीलाई नेपालको सामाजिक तथा आर्थिक रूपान्तरणसँग जोड्ने उद्देश्य रहेको बताएकी छन्।
“विश्वभर छरिएर रहेका नेपाली समुदायसँग काम गर्दा मैले हासिल गरेको अनुभव नेपाली कांग्रेसलाई दिन चाहन्छु। विदेशमा रहेका नेपालीलाई नेपालको सामाजिक तथा आर्थिक रूपान्तरणसँग जोड्नु मेरो उद्देश्य हो,” थापाले भनेकी छन्।
व्यक्तिगत पदभन्दा अनुभवलाई नीतिनिर्माणमा उपयोग गर्ने दाबी
थापाले आफ्नो उम्मेदवारीलाई व्यक्तिगत पद प्राप्तिको उद्देश्यमा मात्र सीमित नरहेको बताउँदै वर्षौंदेखि सामाजिक तथा गैरआवासीय नेपाली अभियानमा हासिल गरेको अनुभवलाई राष्ट्रिय राजनीतिको नीतिनिर्माण तहमा उपयोग गर्ने प्रयासका रूपमा प्रस्तुत गरेकी छन्।
उनले विश्वभरका नेपाली समुदायको अनुभव, महिला तथा युवाको ऊर्जा र नेपालभित्रका नागरिकका आकांक्षालाई जोडेर समावेशी तथा लोकतान्त्रिक नेपाल निर्माणमा योगदान गर्ने प्रतिबद्धता व्यक्त गरेकी छन्।
नेपाली कांग्रेसको १५औँ महाधिवेशनको केन्द्रीय कार्यसमितिका लागि उम्मेदवारी दर्ता असोज १९ गते हुने निर्वाचन समितिले जनाएको छ।
द टन न्युज
विशेष रिपोर्ट
