द टन न्युज | विशेष रिपोर्ट
राजनीतिक दलभन्दा ठूलो देश हो, नेताभन्दा ठूलो जनता हुन् : भुवन अधिकारी
जापान । द टन न्युज
सपना ग्रुप जापानका अध्यक्ष एवं युवा व्यवसायी भुवन अधिकारीले राजनीतिक दल र नेताहरूलाई अन्धाधुन्ध विश्वास गर्नुभन्दा उनीहरूको काम, व्यवहार र जनताप्रतिको जिम्मेवारीका आधारमा मूल्याङ्कन गर्न सम्पूर्ण नेपाली जनतालाई आग्रह गरेका छन्।
आफ्नो व्यक्तिगत स्वतन्त्र वक्तव्यमार्फत अधिकारीले राजनीतिक आस्था र विचार फरक हुन सक्ने भए पनि देश, नागरिक र भावी पुस्ताको भविष्य सबैको साझा जिम्मेवारी भएको बताएका छन्।
उनले गरिब तथा विपन्न जनताको दुःख, बाध्यता र भावनालाई राजनीतिक स्वार्थका लागि प्रयोग गर्ने प्रवृत्तिप्रति सचेत रहनुपर्ने उल्लेख गरेका छन्। जनताको मत र विश्वासबाट सत्तामा पुगेपछि जनताका आधारभूत समस्या बिर्सने तथा सार्वजनिक स्रोतसाधनको उपयोगमा जवाफदेहिता नदेखाउने प्रवृत्तिमाथि नागरिकले प्रश्न उठाउनुपर्ने उनको धारणा छ।
अधिकारीले आफ्नो वक्तव्यमा भनेका छन्, “राजनीतिक दलभन्दा ठूलो देश हो, नेताभन्दा ठूलो जनता हुन् र आजको राजनीतिक निर्णयभन्दा ठूलो हाम्रो सन्तानको भविष्य हो।”
उनले कुनै पनि राजनीतिक दलमा आबद्ध नागरिकलाई आफूले समर्थन गरिरहेको राजनीतिक गतिविधिले आफ्ना छोराछोरी, नातिनातिना र भावी पुस्ताको भविष्यमा कस्तो प्रभाव पारिरहेको छ भन्ने विषयमा गम्भीर भएर सोच्न आग्रह गरेका छन्।
राजनीतिक स्वार्थका लागि जनतालाई आपसमा भिडाउने, हिंसा तथा द्वन्द्वलाई प्रोत्साहन गर्ने र युवाहरूको भविष्य जोखिममा पार्ने गतिविधिप्रति सचेत रहनुपर्ने उनको भनाइ छ। युवाहरूले देशमै शान्ति, शिक्षा, रोजगारी र सम्मानपूर्वक जीवनयापन गर्न पाउने वातावरण निर्माण गर्नु सबैको साझा दायित्व भएको उनले बताएका छन्।
“कुनै पनि नेता वा पार्टीको पछि लाग्नुअघि सत्य बुझ्नुहोस्, प्रश्न गर्नुहोस् र सही तथा गलत छुट्याउनुहोस्। कसैको अन्धभक्त नबन्नुहोस्। देश र जनताको हितलाई पहिलो प्राथमिकता दिनुहोस्,” अधिकारीले अपिल गरेका छन्।
आफ्नो अभिव्यक्ति कसैप्रति घृणा फैलाउने उद्देश्यले नभई नागरिकलाई सचेत बनाउने प्रयास भएको स्पष्ट पार्दै उनले सबैलाई आफ्नो विचार जबर्जस्ती स्वीकार गराउन नसकिने बताएका छन्।
उनले एक जना, दुई जना वा तीन–चार जनालाई मात्रै भए पनि सकारात्मक सोच र नागरिक चेतनाका विषयमा बुझाउन सकिए त्यसले समाजमा परिवर्तनको सुरुवात गर्न सक्ने विश्वास व्यक्त गरेका छन्।
वक्तव्यको अन्त्यमा अधिकारीले पशुपतिनाथ भगवान् र भगवान् गौतम बुद्धसँग सम्पूर्ण नेपाली जनताको रक्षा, देशमा शान्ति, सद्भाव, न्याय र समृद्धि तथा भावी पुस्ताको सुरक्षित र उज्ज्वल भविष्यका लागि प्रार्थना गरेका छन्।
उनको सन्देशको मूल भाव नागरिकको विवेक, राजनीतिक जवाफदेहिता, सामाजिक सद्भाव र भावी पुस्ताको भविष्यप्रतिको जिम्मेवारीमा केन्द्रित देखिन्छ।
