रवि लामिछाने आठदिने चीन भ्रमणमा जाँदै, चिनियाँ उच्च नेतृत्वसँग भेटवार्ता हुने
काठमाडौं । सत्तारुढ राष्ट्रिय स्वतन्त्र पार्टी (रास्वपा) का सभापति रवि लामिछाने भदौ ७ देखि १४ गतेसम्म आठदिने चीन भ्रमणमा जाने भएका छन्। चिनियाँ कम्युनिस्ट पार्टीको निमन्त्रणामा लामिछाने पाँच सदस्यीय प्रतिनिधिमण्डलको नेतृत्व गर्दै चीन जान लागेका हुन्।
भ्रमणका क्रममा लामिछानेले चिनियाँ उपराष्ट्रपति हान झेङ, विदेशमन्त्री वाङ यी तथा चिनियाँ कम्युनिस्ट पार्टीको विदेश विभागका प्रमुख लिउ हाइसिङसँग भेटवार्ता गर्ने कार्यक्रम रहेको बताइएको छ। भ्रमण द्विपक्षीय सम्बन्ध, सहकार्य र राजनीतिक संवाद विस्तारमा केन्द्रित हुने जनाइएको छ। (kathmandupati)
प्रारम्भिक कार्यतालिकाअनुसार लामिछानेको चिनियाँ राष्ट्रपति सी चिनफिङसँग भने भेटवार्ता तय भएको छैन। यद्यपि भ्रमणको क्रममा उच्चस्तरीय राजनीतिक भेटघाट र छलफल हुने अपेक्षा गरिएको छ।
बेइजिङ भ्रमणपछि लामिछाने नेतृत्वको टोली तिब्बतस्थित कैलाश मानसरोवरसमेत जाने तयारीमा रहेको बताइएको छ। धार्मिक तथा सांस्कृतिक महत्व बोकेको कैलाश मानसरोवर भ्रमणले चीन भ्रमणलाई थप विविध बनाउने देखिएको छ।
यसअघि लामिछाने भारतीय जनता पार्टीको निमन्त्रणामा भारत भ्रमणमा गएका थिए। भारतपछि चीन भ्रमण गर्न लागेका लामिछानेको यो यात्रालाई नेपालको छिमेकी मुलुकसँगको सम्बन्ध र रास्वपाको अन्तर्राष्ट्रिय राजनीतिक सम्पर्क विस्तारका दृष्टिले पनि अर्थपूर्ण रूपमा हेरिएको छ।
चीनसँग नेपालको सम्बन्धका विषयमा ‘एक चीन नीति’, पूर्वाधार, कनेक्टिभिटी, व्यापार तथा पारस्परिक सहकार्यलगायत विषयहरू निरन्तर चर्चामा रहँदै आएका छन्। यस्तो पृष्ठभूमिमा रास्वपा सभापतिको चीन भ्रमणलाई राजनीतिक तथा कूटनीतिक चासोका साथ हेरिएको छ।
