आर्य होटल एण्ड स्पाको १० लाख सहयोग, अर्थ मन्त्रालयका सहसचिवलाई चेक हस्तान्तरण; भेटमा अर्थमन्त्री वाग्लेले दिए धन्यवाद
काठमाडौं । भोटेकोशी नदीमा आएको विनाशकारी बाढीबाट प्रभावित नागरिकको पीडामा साथ दिँदै ठमेलस्थित आर्य होटल एण्ड स्पाले राहत तथा उद्धारका लागि १० लाख रुपैयाँ आर्थिक सहयोग गरेको छ।
आर्य होटल एण्ड स्पाका प्रमुख सञ्चालक कृष्ण सिम्खडाको नेतृत्वमा होटलले विपद्को यस कठिन घडीमा पीडित नागरिकको सहयोगका लागि उक्त रकम प्रदान गरेको हो।
सिम्खडाले देश र जनतामाथि विपद् परेको समयमा आफू पनि चुप लागेर बस्न नहुने भन्दै सामाजिक उत्तरदायित्व र मानवीय भावनाका साथ सहयोग गर्ने निर्णय गरेका हुन्। उनका लागि यो सहयोग कुनै प्रचार वा व्यक्तिगत चर्चाको विषय नभई संकटको समयमा नागरिकप्रतिको आफ्नो जिम्मेवारी पूरा गर्ने प्रयास हो।
‘देश रोइरहेको बेला आफू पनि चुप लागेर बस्नु हुँदैन’ भन्ने भावनासहित गरिएको यो सहयोगले विपद्मा परेका नागरिकप्रतिको मानवीय संवेदनालाई उजागर गरेको छ।
आर्य होटल एण्ड स्पाको तर्फबाट प्रदान गरिएको १० लाख रुपैयाँको सहयोग रकमको चेक अर्थ मन्त्रालयमा हस्तान्तरण गरिएको छ। होटलका जनरल म्यानेजर धुर्ब शर्मा र फाइनान्स हेड गोपाल सिम्खडाले अर्थ मन्त्रालयका सहसचिव डा. सुमन दाहाललाई सहयोग रकमको चेक हस्तान्तरण गरेका हुन्। चेक हस्तान्तरणका क्रममा द टन न्युजका प्रधान सम्पादक एचबी ताम्राकारको समेत उपस्थिति रहेको थियो।
नेपाल सरकारका वरिष्ठ सहसचिव तथा हाल अर्थ मन्त्रालयमा कार्यरत डा. सुमन दाहालले आर्य होटल एण्ड स्पाको तर्फबाट प्रदान गरिएको सहयोग ग्रहण गरेका थिए।
चेक हस्तान्तरणपछि आर्य होटल एण्ड स्पाको टोलीले अर्थमन्त्री डा. स्वर्णिम वाग्लेसँग समेत भेट गरेको थियो। भेटका क्रममा होटलका जनरल म्यानेजर धुर्ब शर्मा र अर्थमन्त्री वाग्लेबीच केही समय विपद्को अवस्था तथा राहत र पुनःस्थापनाका विषयमा संवाद भएको थियो।
सो अवसरमा अर्थमन्त्री डा. वाग्लेले भोटेकोशी बाढीबाट प्रभावित नागरिकका लागि आर्य होटल एण्ड स्पाले गरेको सहयोगप्रति धन्यवाद व्यक्त गरेका थिए।
आर्य होटल एण्ड स्पाका प्रमुख सञ्चालक कृष्ण सिम्खडाले देश संकटमा परेको बेला निजी क्षेत्रले आफ्नो सामाजिक दायित्व निर्वाह गर्नुपर्ने धारणा राख्दै आएको बताइएको छ। उनको नेतृत्वमा गरिएको यो सहयोगले व्यवसायसँगै सामाजिक उत्तरदायित्वलाई पनि प्राथमिकता दिएको देखाएको छ।
भोटेकोशी बाढीका कारण कैयौँ नागरिकले घरबार, सम्पत्ति तथा आफन्त गुमाएका छन्। प्रभावित परिवारहरू अहिले राहत, पुनःस्थापना र पुनर्निर्माणको पर्खाइमा छन्। यस्तो पीडाको समयमा राज्यसँगै निजी क्षेत्र, व्यवसायी, समाजसेवी तथा आम नागरिक एकजुट भएर उभिनुपर्ने आवश्यकता छ।
आर्य होटल एण्ड स्पाको यो सहयोग रकममा मात्र सीमित छैन। ‘पीडितको दुःख मेरो पनि दुःख हो’ भन्ने मानवीय भावनाको उदाहरणका रूपमा समेत यसलाई हेरिएको छ।
देशलाई अहिले भाषणभन्दा सहयोग चाहिएको छ, पीडितलाई आश्वासनभन्दा साथ चाहिएको छ। यही भावनाका साथ आर्य होटल एण्ड स्पाका प्रमुख सञ्चालक तथा मालिक कृष्ण सिम्खडाको नेतृत्वमा गरिएको १० लाख रुपैयाँको सहयोग संकटको घडीमा निजी क्षेत्रबाट व्यक्त भएको मानवीय संवेदनाको महत्वपूर्ण उदाहरण बनेको छ।
विपद्को समयमा गरिएको सहयोगको मूल्य रकमले मात्र निर्धारण हुँदैन, त्यसले अरूलाई सहयोगका लागि प्रेरित गर्ने शक्ति पनि राख्छ। आर्य होटल एण्ड स्पाले अघि सारेको यो मानवीय कदमले अन्य व्यवसायी, संघ–संस्था, समाजसेवी तथा सक्षम नागरिकलाई समेत आफ्नो ठाउँबाट पीडित परिवारका लागि सहयोगको हात बढाउन प्रेरणा दिने विश्वास गरिएको छ।
