NRNA मध्यपूर्व क्षेत्रीय बैठकको पूर्वतयारी तीव्र, रमेश श्रेष्ठसहित शीर्ष नेतृत्वबीच महत्वपूर्ण छलफल
द टन न्युज । काठमाडौं ।
गैरआवासीय नेपाली संघ (NRNA) मध्यपूर्व क्षेत्रीय बैठकको पूर्वतयारीलाई केन्द्रमा राख्दै संघका नेतृत्व तथा सरोकारवालाबीच महत्वपूर्ण छलफल सम्पन्न भएको छ। बैठकको तयारी, मध्यपूर्वमा रहेका नेपालीका विविध सवाल तथा संघको आगामी कार्यदिशालगायत विषयमा छलफल केन्द्रित रहेको बताइएको छ।
गैरआवासीय नेपाली संघका प्रभावशाली नेता एवं जीसीडी ग्रुप अफ कम्पनीजका अध्यक्ष रमेश श्रेष्ठको सक्रियतामा भएको छलफलमा संघका अन्तर्राष्ट्रिय समन्वय परिषद्का उपाध्यक्ष एवं विपद् व्यवस्थापन समितिका संयोजक मनोज कुमार श्रेष्ठ ‘गोर्खाली’, सचिव भुवानी प्रसाद तिमिल्सिना, मध्यपूर्व उप–संयोजक विकास शाही, वरिष्ठ पत्रकार तथा कान्तिपुर समाचारका संवाददाता होम कार्की र हेमन्त मोक्तान लगायतको सहभागिता रहेको थियो।
मध्यपूर्व क्षेत्रमा कार्यरत नेपाली श्रमिक, व्यवसायी तथा विभिन्न पेशा–व्यवसायमा आबद्ध नेपाली समुदायका विषयलाई प्रभावकारी रूपमा सम्बोधन गर्ने तथा संघका गतिविधिलाई थप व्यवस्थित र परिणाममुखी बनाउने विषयमा छलफल भएको जनाइएको छ।
छलफलमा आगामी मध्यपूर्व क्षेत्रीय बैठकलाई प्रभावकारी, उपलब्धिमूलक र नेपाली समुदायका वास्तविक सरोकारलाई प्राथमिकतामा राख्ने गरी अघि बढाउने विषयमा विचार–विमर्श भएको बताइएको छ।
NRNA नेतृत्व, व्यवसायी तथा सञ्चार क्षेत्रका प्रतिनिधिहरूबीच भएको उक्त भेटघाटलाई मध्यपूर्वमा रहेका नेपाली समुदायका मुद्दा, विपद् व्यवस्थापन, संस्थागत समन्वय र आगामी कार्यक्रमलाई थप प्रभावकारी बनाउने दिशामा महत्वपूर्ण तयारीका रूपमा हेरिएको छ।
रमेश श्रेष्ठ लामो समयदेखि गैरआवासीय नेपाली अभियानसँग जोडिँदै आएका व्यवसायी तथा सामाजिक अभियन्ताका रूपमा सक्रिय छन्। जीसीडी ग्रुप अफ कम्पनीजको नेतृत्वसँगै नेपाली समुदायका सामाजिक तथा संस्थागत गतिविधिमा उनको सक्रियतालाई पनि यस छलफलले थप उजागर गरेको छ।
बैठकको पूर्वतयारीसँगै मध्यपूर्व क्षेत्रमा रहेका नेपालीहरूको हित, समस्या र सम्भावनालाई केन्द्रमा राखेर NRNA का आगामी कार्यक्रमलाई थप प्रभावकारी बनाउने अपेक्षा गरिएको छ।
