कतारदेखि कांग्रेसको केन्द्रीय नेतृत्वसम्मः श्रमिकका सवाल बोकेर मैदानमा बिमल सुवेदी
दुई दशकभन्दा बढी समय श्रमिकका आवाज उठाउँदै आएका सुवेदीको केन्द्रीय सदस्यमा उम्मेदवारी
द टन न्युज । काठमाडौं ।
नेपाली कांग्रेसको १५औँ महाधिवेशनको सरगर्मी बढ्दै जाँदा कतारमा रहेर नेपाली समुदाय तथा श्रमिकका सवालमा सक्रिय रहँदै आएका बिमल सुवेदीले नेपाली कांग्रेसको केन्द्रीय सदस्य पदमा उम्मेदवारी दिने निर्णय गरेका छन्। देशदेखि विदेशसम्म रहेका नेपालीबीच सेवा, सहकार्य र संगठन विस्तारलाई प्राथमिकतामा राख्दै सुवेदीले कांग्रेसको केन्द्रीय नेतृत्वमा आफ्नो भूमिका खोजेका हुन्।
सुवेदीले देशभर तथा विश्वभर रहेका नेपाली जनसम्पर्क समितिबाट १५औँ महाधिवेशनमा सहभागी महाधिवेशन प्रतिनिधिहरूलाई सम्बोधन गर्दै आफ्नो उम्मेदवारीका लागि साथ, सहयोग, माया र अमूल्य मतको अपेक्षा गरेका छन्।
उनको राजनीतिक यात्राको महत्वपूर्ण पक्ष भनेको श्रमिकका आवाज उठाउने र समस्याको समाधान खोज्ने अभियान हो। वैदेशिक रोजगारीमा रहेका नेपाली श्रमिकका समस्या, अधिकार, सम्मान र सामाजिक सुरक्षाका विषयलाई निरन्तर उठाउँदै आएका सुवेदी अब ती आवाजलाई पार्टीको केन्द्रीय तहसम्म पुर्याउने उद्देश्यसहित मैदानमा उत्रिएका छन्।
कतारमा लामो समयदेखि नेपाली समुदायसँग जोडिएर काम गर्दै आएका सुवेदीले विदेशमा रहेका नेपालीका समस्या केवल व्यक्तिगत समस्या नभई राज्य, पार्टी र समाजले गम्भीर रूपमा सम्बोधन गर्नुपर्ने विषय भएको धारणा राख्दै आएका छन्। श्रमिकको आवाज सुन्ने मात्र होइन, समाधान खोज्ने राजनीतिक पात्रका रूपमा आफूलाई स्थापित गर्ने उनको प्रयास देखिन्छ।
सुवेदीको उम्मेदवारीले नेपाली कांग्रेसको विदेशस्थित संगठन र प्रवासी नेपालीका सवाललाई समेत केन्द्रीय राजनीतिक बहससँग जोड्ने अपेक्षा गरिएको छ। स्वदेशमा रहेका नागरिकसँगै विदेशमा श्रम गरिरहेका लाखौँ नेपालीको भावना, अनुभव र समस्यालाई कांग्रेसको नीति तथा नेतृत्वमा समेट्नुपर्ने उनको जोड छ।
“तपाईंहरूको साथ मेरो आधार हो,” भन्दै सुवेदीले महाधिवेशन प्रतिनिधिहरूसँग आफ्नो उम्मेदवारीका लागि विश्वास र सहयोगको अपेक्षा गरेका छन्।
उनले नेपाली कांग्रेसलाई थप सशक्त, सुदृढ र जनमुखी बनाउन स्वदेश तथा विदेशमा रहेका नेपालीबीच सेवा र सहकार्यलाई अझ व्यापक बनाउने प्रतिबद्धता व्यक्त गरेका छन्।
दुई दशकभन्दा बढी समय श्रमिकका आवाजसँग जोडिएको अनुभवलाई अब पार्टीको केन्द्रीय जिम्मेवारीसँग जोड्ने लक्ष्यसहित सुवेदीको उम्मेदवारी अगाडि आएको छ। कतारबाट उठेको श्रमिकको आवाज कांग्रेसको केन्द्रीय नेतृत्वसम्म पुर्याउने उनको अभियान १५औँ महाधिवेशनमा चर्चाको विषय बनेको छ।
