युवालाई देश बनाउने शक्तिका रूपमा निर्माण गरौँ : डा. सुनिल कुमार शर्मा
काठमाडौं। नेपाली कांग्रेसका प्रभावशाली नेता तथा युवा व्यवसायी डा. सुनिल कुमार शर्माले युवालाई केवल उमेरको एउटा चरणका रूपमा नभई राष्ट्रको वर्तमान ऊर्जा र भविष्यको सम्भावनाका रूपमा हेर्नुपर्ने बताएका छन्।
अन्तर्राष्ट्रिय युवा दिवसका अवसरमा शुभकामना व्यक्त गर्दै डा. शर्माले युवामा रहेको ज्ञान, सीप, सिर्जनशीलता, साहस र श्रमलाई देश निर्माणमा जोड्न सके नेपालको सबैभन्दा ठूलो सम्पत्ति युवा शक्ति बन्न सक्ने बताएका हुन्।
उनले रोजगारी, शिक्षा र अवसरको खोजीमा लाखौँ नेपाली युवा विदेशिन बाध्य भइरहेको अवस्थाप्रति चिन्ता व्यक्त गरेका छन्। गाउँमा युवाको अभाव र विदेशमा नेपाली युवाको श्रम तथा पसिनालाई नेपालको विकाससँग जोडेर हेर्नुपर्ने उनको भनाइ छ।
डा. शर्माले सरकारले युवालाई विदेश जानबाट रोक्नेभन्दा पनि देशमै बस्न चाहने वातावरण निर्माण गर्ने नीति लिनुपर्नेमा जोड दिएका छन्। शिक्षामा अवसर विस्तार, सीप तथा उद्यमशीलतामा लगानी वृद्धि र शिक्षालाई रोजगारी तथा उत्पादनसँग जोड्नुपर्ने उनले बताएका छन्।
“देशमा अवसर सिर्जना भयो भने युवाको ऊर्जा विदेश होइन, आफ्नै माटोमा खर्च हुनेछ,” डा. शर्माले आफ्नो सामाजिक सञ्जालमार्फत उल्लेख गरेका छन्।
स्वास्थ्य तथा व्यवसायिक क्षेत्रमा समेत सक्रिय डा. शर्मा युवा उद्यमशीलताको प्रतिनिधित्व गर्ने व्यवसायीका रूपमा परिचित छन्। उनी केएमसी अस्पताल (KMC Hospital) तथा नोबेल अस्पताल (Noble Hospital) लगायतका स्वास्थ्य संस्थासँग जोडिएका छन्।
अन्तर्राष्ट्रिय युवा दिवसको अवसरमा सम्पूर्ण नेपाली युवालाई शुभकामना दिँदै डा. शर्माले युवालाई देशको सीमिततामा बाँध्ने नभई देश निर्माणको शक्तिका रूपमा विकास गर्नुपर्ने बताएका छन्।
उनको सन्देशमा युवा पुस्तालाई अवसर, शिक्षा, सीप, उद्यमशीलता र उत्पादनसँग जोडेर स्वदेशमै भविष्य निर्माण गर्न सक्ने वातावरण बनाउनुपर्ने विषयलाई प्राथमिकता दिइएको छ।
“युवा उमेरको एउटा चरण होइन, राष्ट्रको वर्तमान ऊर्जा र भविष्यको सम्भावना हो।” डा. शर्माको भनाइ छ।
