कांग्रेस महामन्त्रीमा आङ्गेलु शेर्पाको उम्मेदवारी घोषणा
१५औँ महाधिवेशनमा महामन्त्रीको दौडमा शेर्पा — संगठन सुदृढीकरण, समन्वय र नयाँ राजनीतिक ऊर्जाको सन्देश
द टन न्युज । विशेष रिपोर्ट
नेपाली कांग्रेसका कार्यसम्पादन समिति सदस्य आङ्गेलु शेर्पाले नेपाली कांग्रेसको महामन्त्री पदमा उम्मेदवारी दिने घोषणा गरेका छन्। आसन्न १५औँ महाधिवेशनलाई लक्षित गर्दै शेर्पाले महामन्त्री पदमा आफ्नो उम्मेदवारी प्रस्तुत गर्ने बताएका हुन्।
पार्टीको अघिल्लो केन्द्रीय समितिमा समेत रहेका शेर्पा विशेष महाधिवेशनपछि बनेको केन्द्रीय समितिमा पनि महत्वपूर्ण जिम्मेवारीसहित सक्रिय छन्। लामो समयदेखि कांग्रेसको संगठन, आन्तरिक समन्वय र राजनीतिक गतिविधिमा सक्रिय शेर्पाको महामन्त्री पदमा उम्मेदवारी घोषणालाई कांग्रेसभित्र नयाँ नेतृत्वको बहससँग जोडेर हेरिएको छ।
विशेष महाधिवेशनको माग चर्किंदै जाँदा कांग्रेसभित्र तत्कालीन संस्थापन र इतर समूहबीच देखिएको मतभेदलाई संवाद र सहमतिमार्फत व्यवस्थापन गर्न शेर्पाले समन्वयकारी भूमिका निर्वाह गरेका थिए। पार्टीभित्र विभिन्न धारबीच संवादको वातावरण बनाउन उनको सक्रियता देखिएको कांग्रेस नेताहरू बताउँछन्।
सोलुखुम्बुका शेर्पा भूगोल, संगठन र पार्टीभित्रको अन्तरसम्बन्धलाई जोडेर अघि बढ्ने नेतृत्वको आवश्यकता रहेको धारणा राख्दै आएका छन्। महामन्त्री पदको उम्मेदवारी घोषणासँगै उनले कांग्रेसको संगठनलाई थप चलायमान बनाउने, नेता–कार्यकर्ताबीचको सम्बन्ध मजबुत बनाउने तथा पार्टीभित्र संवाद र सहकार्यको संस्कारलाई प्राथमिकता दिने विषयलाई अगाडि सारेका छन्।
आसन्न १५औँ महाधिवेशनले नेपाली कांग्रेसको भावी नेतृत्व र संगठनात्मक दिशाबारे महत्वपूर्ण निर्णय गर्ने तयारी भइरहेका बेला महामन्त्री पदमा शेर्पाको प्रवेशले नेतृत्वको प्रतिस्पर्धालाई थप बहुआयामिक बनाएको छ।
सोलुखुम्बुबाट राष्ट्रिय राजनीतिको केन्द्रमा प्रभाव विस्तार गरेका शेर्पाले अब महामन्त्री पदको यात्रालाई कसरी अघि बढाउँछन् भन्ने विषय कांग्रेसको महाधिवेशनसँगै थप स्पष्ट हुँदै जानेछ।
“समन्वय, संगठन र नयाँ ऊर्जासहित कांग्रेसलाई अघि बढाउने अभियान” भन्ने सन्देशसहित शेर्पाको उम्मेदवारीले कांग्रेसभित्र नयाँ बहस सुरु गराएको छ।
द टन न्युज
विशेष रिपोर्ट
