द टन न्युज ॥ विशेष रिपोर्ट
कैलाली–४ मा सर्वाधिक मतसहित विजयी गोरखबहादुर बिष्ट ‘आनन्द’ले दिए आभार
‘यो विजय व्यक्तिगत उपलब्धि होइन, संगठनलाई अझ बलियो बनाउने जिम्मेवारी हो’
धनगढी, १५ असोज । नेपाली कांग्रेसका प्रभावशाली नेता गोरखबहादुर बिष्ट ‘आनन्द’ले कैलाली निर्वाचन क्षेत्र नं. ४ का क्षेत्रीय प्रतिनिधिहरूबाट प्राप्त विश्वासप्रति हार्दिक आभार तथा कृतज्ञता व्यक्त गर्नुभएको छ।
नेपाली कांग्रेसको १५औँ महाधिवेशनअन्तर्गत क्षेत्र नं. ४ बाट सर्वाधिक मतसहित विजयी भएपछि बिष्टले सामाजिक सञ्जालमार्फत क्षेत्रीय प्रतिनिधि, वडा सभापति, अग्रज नेता तथा सम्पूर्ण कांग्रेसजनप्रति धन्यवाद व्यक्त गर्नुभएको हो।
उहाँले आफूलाई प्राप्त भएको अपार माया, विश्वास, साथ र सहयोगले थप जिम्मेवारीबोध गराएको बताउनुभएको छ।
बिष्टले आफ्नो विजयलाई केवल व्यक्तिगत उपलब्धिका रूपमा नलिएको स्पष्ट पार्दै यसलाई कैलाली क्षेत्र नं. ४ को संगठन निर्माण, आपसी एकता, सहमति र सहकार्यलाई अझ सुदृढ बनाउने जिम्मेवारी र प्रेरणाका रूपमा लिएको उल्लेख गर्नुभएको छ।
उहाँले आगामी दिनमा पनि सबैलाई साथमा लिएर संगठनलाई थप मजबुत, गतिशील र प्रभावकारी बनाउने प्रतिबद्धता व्यक्त गर्नुभएको छ।
“आगामी दिनमा पनि सबैलाई साथमा लिएर, आपसी विश्वास र एकताको भावनासहित संगठनलाई अझ मजबुत र गतिशील बनाउन निरन्तर समर्पित रहने प्रतिबद्धता व्यक्त गर्दछु,” बिष्टले भन्नुभएको छ।
कैलाली–४ मा प्राप्त परिणामले बिष्टको संगठनभित्रको प्रभाव र क्षेत्रीय प्रतिनिधिहरूमाझ रहेको विश्वासलाई थप प्रस्ट पारेको कांग्रेस वृत्तमा चर्चा हुन थालेको छ। लामो समयदेखि कांग्रेसको संगठन निर्माण तथा पार्टी गतिविधिमा सक्रिय बिष्टले प्राप्त गरेको सर्वाधिक मतलाई आगामी दिनमा संगठनलाई अझ एकताबद्ध बनाउने आधारका रूपमा लिएको देखिन्छ।
विजयपछि आफ्नो धारणा सार्वजनिक गर्दै बिष्टले आफूलाई प्राप्त विश्वासप्रति भावनात्मक रूपमा आभार व्यक्त गर्दै भन्नुभएको छ—
“अन्तिम मत परिणामले दिएको यो विश्वासका लागि आभारी छु, कृतज्ञ छु, ऋणी छु।”
बिष्टको यो अभिव्यक्तिले विजयसँगै जिम्मेवारीबोध र संगठनप्रतिको प्रतिबद्धतालाई समेत जोड दिएको छ।
