द टन न्युज, कैलाली । गोदावरी नगरपालिका–१० स्थित मालाखेती भिजन इङ्गलिस बोर्डिङ स्कुल मा नतिजा प्रकाशन तथा दिक्षान्त समारोह भव्य रूपमा सम्पन्न भएको छ। विद्यार्थी, अभिभावक र शिक्षकहरूको उल्लेखनीय सहभागितामा सम्पन्न कार्यक्रमले शिक्षा क्षेत्रमा विद्यालयको योगदानलाई पुनः उजागर गरेको छ।
समारोहमा उत्कृष्ट नतिजा हासिल गरेका विद्यार्थीहरूलाई सम्मान तथा प्रमाणपत्र वितरण गरिएको थियो भने दिक्षान्तको गौरवपूर्ण क्षणले सम्पूर्ण वातावरण उत्साहमय बनेको थियो। विद्यालयले पछिल्ला वर्षहरूमा शैक्षिक गुणस्तर, अनुशासन र समग्र विकासमा उल्लेखनीय प्रगति हासिल गर्दै आएको छ।
कार्यक्रमप्रति खुशी व्यक्त गर्दै गोदावरी नगरपालिका वडा नं. १० का अध्यक्ष रविन्द्र शाही गुड्डु ले सामाजिक सञ्जालमार्फत विद्यालय परिवारप्रति धन्यवाद ज्ञापन गरेका छन्। उनले शिक्षा क्षेत्रको विकासमा विद्यालयले खेलेको भूमिकाको उच्च प्रशंसा गर्दै यस्ता कार्यक्रमले विद्यार्थीहरूलाई अझ प्रेरित गर्ने विश्वास व्यक्त गरे।
उनले लेखेका छन्— “नतिजा प्रकाशन तथा दिक्षान्त समारोह सफलतापूर्वक सम्पन्न गरेकोमा सम्पूर्ण विद्यालय परिवारलाई धन्यवाद।”
स्थानीय तहको सक्रिय सहकार्य र विद्यालयको निरन्तर प्रयासले गोदावरी क्षेत्रमा गुणस्तरीय शिक्षाको वातावरण मजबुत बन्दै गएको देखिन्छ। दिक्षान्त समारोहले विद्यार्थीहरूको भविष्यप्रति नयाँ आशा र आत्मविश्वास थपेको सहभागीहरूले बताएका छन्।
