मन्त्री गीता चौधरीले सञ्चालनमा ल्याइन् ‘एएमपिआइएस नेपाल’ मोबाइल एप, १२ संघीय कृषि बजारको दैनिक थोक मूल्य अब मोबाइलमै
काठमाडौं — कृषि, वन तथा पर्यावरण मन्त्री गीता चौधरीको पहलमा कृषकलाई कृषि उपजको बजार मूल्य सहज, पारदर्शी र समयमै उपलब्ध गराउने उद्देश्यले ‘एएमपिआइएस नेपाल (AMPIS Nepal)’ मोबाइल एप सञ्चालनमा ल्याइएको छ। अब यस एपमार्फत देशभरका १२ वटा संघीय कृषि बजारमा दैनिक कारोबार हुने कृषि उपजको थोक मूल्य मोबाइलबाटै हेर्न सकिने भएको छ।
यो एप मन्त्रिपरिषद्ले २०८२ चैत १३ गते स्वीकृत गरेको शासकीय सुधारसम्बन्धी १०० कार्यसूचीअन्तर्गत रहेको “राष्ट्रिय कृषि बजार सूचना प्रणाली सञ्चालन गर्ने तथा एसएमएस र डिजिटल माध्यमबाट दैनिक मूल्य जानकारी कृषकसम्म पुर्याउने” कार्यक्रम कार्यान्वयनका लागि सञ्चालनमा ल्याइएको हो।
मन्त्री चौधरीले कृषकलाई बिचौलियामा निर्भर हुन नपर्ने, बजारको वास्तविक मूल्य सहज रूपमा प्राप्त हुने तथा डिजिटल प्रविधिमार्फत कृषि बजारलाई थप पारदर्शी, व्यवस्थित र प्रविधिमैत्री बनाउने सरकारको लक्ष्यअनुसार एप सञ्चालनमा ल्याइएको बताउनुभयो। उहाँका अनुसार कृषि क्षेत्रको आधुनिकीकरणसँगै सूचना प्रविधिको प्रयोग विस्तार गर्नु सरकारको प्रमुख प्राथमिकतामध्ये एक हो।
यसअघि कृषि विभागको वेबसाइटमार्फत मात्र उपलब्ध हुँदै आएको कृषि बजार मूल्य सूचना प्रणालीलाई स्तरोन्नति गर्दै कालिमाटी फलफूल तथा तरकारी बजार विकास समितिसँगको समन्वयमा अब कालिमाटीसहित सुनसरी, झापा, धनुषा, सर्लाही, सिन्धुली, कास्की, नवलपरासी (पूर्व), रुपन्देही, बाँके, सुर्खेत र कैलालीका १२ वटा संघीय कृषि बजारको दैनिक थोक मूल्य ‘एएमपिआइएस नेपाल’ एपमार्फत सार्वजनिक गर्न थालिएको हो।
एन्ड्रोइड प्रणाली भएका मोबाइलमा प्रयोग गर्न मिल्ने यो एप २०८३ साउन ८ गतेदेखि उपलब्ध भएको छ। कृषि विभागको वेबसाइटमा राखिएको क्यूआर कोड स्क्यान गरेर पनि एप डाउनलोड तथा प्रयोग गर्न सकिने व्यवस्था गरिएको छ।
एपमार्फत कृषक तथा सरोकारवालाले कृषि उपजको न्यूनतम, अधिकतम र औसत थोक मूल्य, विभिन्न बजारअनुसार मूल्य तुलना, मूल्यको प्रवृत्ति (ट्रेन्ड) तथा कृषि मौसमी सल्लाह बुलेटिनसम्बन्धी जानकारी सहज रूपमा प्राप्त गर्न सक्नेछन्।
मन्त्री चौधरीले यस प्रणालीले कृषकलाई उत्पादन बिक्रीका लागि उपयुक्त बजार छनोट गर्न, उचित मूल्य प्राप्त गर्न तथा बजारसम्बन्धी निर्णय तथ्यमा आधारित बनाउन महत्वपूर्ण सहयोग पुग्ने विश्वास व्यक्त गर्नुभयो। उहाँले कृषि क्षेत्रमा डिजिटल सेवाको विस्तारले कृषकको सूचना पहुँच बढाउनुका साथै कृषि बजारलाई अझ प्रभावकारी र व्यवस्थित बनाउने बताउनुभयो।
कृषि विभागले मोबाइल एप वा कृषि बजार सूचना प्रणालीसम्बन्धी थप जानकारी आवश्यक परे तथ्यांक अधिकृत उर्मिला शाहीसँग सम्पर्क गर्न सकिने जनाएको छ।
