द टन न्युज , काठमाडौं । गृहमन्त्री सुधन गुरुङले आफ्नो सम्पत्ति विवरण सार्वजनिक गर्दै पारदर्शिता र सुशासनप्रति प्रतिबद्धता देखाएका छन्। सार्वजनिक विवरणले नागरिकबीच विश्वास अभिवृद्धि गर्ने तथा जिम्मेवार राजनीतिक संस्कृतिको विकासमा सकारात्मक सन्देश दिएको छ।
उपलब्ध विवरण अनुसार गुरुङको नाममा कुल ४ करोड ३१ लाख ५६ हजार २ सय रुपैयाँ बराबरको शेयर रहेको छ, जसमा २ करोड ७४ लाख ५६ हजार २ सय रुपैयाँ धितोपत्र बजारमा कारोबार हुने शेयरमा लगानी गरिएको उल्लेख छ। यसले उनी लगानी र वित्तीय व्यवस्थापनमा सक्रिय रहेको देखाउँछ।
अचल सम्पत्तितर्फ, उनको व्यक्तिगत नाममा धनकुटामा १९ रोपनी १५ आना जग्गा रहेको छ भने पिता दिलबहादुर गुरुङको नाममा चितवनमा ३० कठ्ठा जग्गा रहेको उल्लेख गरिएको छ। साथै, बाजे रामसल गुरुङको नाममा गोरखाको चुमनुब्री क्षेत्रमा २२१ रोपनी जग्गा रहेको विवरणमा समेटिएको छ।
बैंक मौज्दाततर्फ, लक्ष्मी सनराइज बैंकमा ५ लाख ३५ हजार रुपैयाँ र नबिल बैंकमा ५६ लाख २५ हजार रुपैयाँ रहेको छ। त्यस्तै, पैतृक सम्पत्तिको रूपमा ८९ तोला सुन तथा ६ किलो चाँदी पनि उल्लेख गरिएको छ।
सम्पत्ति विवरण सार्वजनिक गर्ने कदमले सार्वजनिक पदमा रहेका व्यक्तिहरूले जवाफदेहिता र पारदर्शितालाई प्राथमिकता दिनुपर्ने सन्देश दिएको छ। गृहमन्त्री गुरुङको यो पहललाई सकारात्मक उदाहरणका रूपमा लिइएको छ, जसले स्वच्छ र विश्वासिलो शासन व्यवस्थामा टेवा पुर्याउने अपेक्षा गरिएको छ।
