काठमाडौं । प्रधानमन्त्री कार्यालयले आइतबार सार्वजनिक गरेको विवरणअनुसार मन्त्री पोखरेलले कुल २४ करोड १६ लाख रुपैयाँ बराबरको सम्पत्ति विवरण सार्वजनिक गरेका छन्। उक्त कदमलाई पारदर्शिता र जिम्मेवार शासनप्रतिको सकारात्मक उदाहरणका रूपमा हेरिएको छ।
सार्वजनिक विवरणअनुसार, मन्त्री पोखरेलको व्यक्तिगत नाममा काठमाडौंमा तीन आना क्षेत्रफलमा बनेको अढाई तले घर रहेको छ, जसको मूल्य करिब ४ करोड रुपैयाँ तोकिएको छ। त्यस्तै, काठमाडौंकै मूलपानीमा ६ आना जग्गा (५ करोड रुपैयाँ) र मोरङमा १ कठ्ठा जग्गा (१ करोड रुपैयाँ) पनि उनको नाममा रहेको छ।
पारिवारिक सम्पत्तितर्फ, बुवाको नाममा काठमाडौंमा ४ आना २ पैसाको घडेरी (करिब साढे २ करोड रुपैयाँ) रहेको छ। आमा मिनाक्षी पोखरेलको नाममा गोदावरी र गोकर्णेश्वरमा गरी करिब ३ करोड रुपैयाँ बराबरको जग्गा रहेको छ भने परिवारको संयुक्त नाममा गोदावरीमा ११ रोपनी ४ आना क्षेत्रफलको जग्गा (५ करोड रुपैयाँ) रहेको उल्लेख छ।
मन्त्री पोखरेलसँग २५ तोला सुन र १०० तोला चाँदी रहेको छ, जसको मूल्य करिब ७५ लाख रुपैयाँ जनाइएको छ। यी सम्पत्तिहरू पैतृक स्रोत, बुवाको जागिर तथा आमाको दाइजोबाट प्राप्त भएको उनले खुलाएका छन्।
बैंक मौज्दाततर्फ सानिमा बैंक र एनआईसी एसिया बैंकमा गरी कुल ४ लाख ४८ हजार रुपैयाँ रहेको छ भने विभिन्न कम्पनीका सेयरमा परिवारको नाममा १ करोड ७७ लाख रुपैयाँ लगानी गरिएको छ।
सवारी साधनतर्फ बुवाको नाममा करिब ७० लाख रुपैयाँ पर्ने एक ईभी कार र मन्त्री पोखरेलको नाममा करिब ४० लाख रुपैयाँको अर्को कार रहेको छ। साथै, उनले ७५ लाख रुपैयाँ ऋण रहेको पनि विवरणमा समेटेका छन्।
समग्रमा आफ्नो सम्पत्ति र दायित्वहरू खुला रूपमा सार्वजनिक गर्नुले पारदर्शिता, उत्तरदायित्व र सुशासनलाई सुदृढ बनाउने सन्देश दिएको छ। मन्त्री पोखरेलको यो पहललाई सकारात्मक र उदाहरणीय कदमका रूपमा लिइएको छ।
