द टन न्युज | विशेष रिपोर्ट
सेप्टेम्बर १८ देखि अमेरिकाको ‘पब्लिक चार्ज’ नियम कडा, ग्रिनकार्ड र भिसा प्रक्रियामा नयाँ प्रभाव
अमेरिकी अध्यागमन नीतिमा सेप्टेम्बर १८ देखि लागू भएको नयाँ ‘पब्लिक चार्ज’ (Public Charge) मापदण्डले ग्रिनकार्ड आवेदन प्रक्रिया, पारिवारिक आप्रवासन तथा केही भिसा आवेदकहरूमा महत्वपूर्ण प्रभाव पार्न थालेको छ। नयाँ व्यवस्थाअनुसार अमेरिकी अध्यागमन अधिकारीहरूले अब आवेदकको आर्थिक अवस्था, आयस्रोत, सरकारी सहायता उपयोग, स्वास्थ्य, शिक्षा, रोजगारी क्षमता तथा भविष्यमा सरकारी सुविधामा निर्भर हुने सम्भावनालाई थप विस्तृत रूपमा मूल्याङ्कन गर्ने भएका छन्।
विशेषज्ञहरूका अनुसार यो नियम मुख्यतः नयाँ ग्रिनकार्ड आवेदकहरूलाई लक्षित भए पनि, अमेरिकामा बसोबास गरिरहेका स्थायी बासिन्दा (ग्रिनकार्डधारी) हरूले भविष्यमा स्पोन्सरशिप, नागरिकता प्रक्रिया वा केही विशेष अध्यागमन आवेदनहरूमा यसको अप्रत्यक्ष प्रभाव महसुस गर्न सक्नेछन्। यद्यपि, कानुनी रूपमा प्राप्त सार्वजनिक सेवाको प्रयोग मात्रका आधारमा ग्रिनकार्ड स्वतः रद्द हुने व्यवस्था भने छैन।
यसैबीच, अमेरिकी विदेश मन्त्रालय तथा विभिन्न अमेरिकी दूतावासहरूले पनि भिसा तथा आप्रवासन प्रक्रियामा ‘पब्लिक चार्ज’ सम्बन्धी मूल्याङ्कनलाई थप कडाइका साथ लागू गर्न थालेका छन्। विशेषगरी परिवारमार्फत ग्रिनकार्ड लिने आवेदकहरूको आर्थिक आत्मनिर्भरता, स्पोन्सरको क्षमता र सरकारी सुविधामा निर्भर हुने सम्भावनाको गहिरो अध्ययन गरिने भएको छ।
अध्यागमन क्षेत्रका विज्ञहरूका अनुसार सेप्टेम्बर १८ अघि दर्ता गरिएका आवेदनहरू पुरानै नियमअनुसार मूल्याङ्कन हुनेछन् भने त्यसपछि दर्ता हुने आवेदनमा नयाँ मापदण्ड लागू हुनेछ। नयाँ नियमसँगै USCIS ले अद्यावधिक फाराम तथा थप आर्थिक विवरण माग गर्न सक्ने व्यवस्था पनि गरेको छ।
यी तथा अमेरिकी अध्यागमनसँग सम्बन्धित अन्य महत्वपूर्ण अपडेटबारे विस्तृत छलफल गर्न १५ वर्षभन्दा बढी अनुभव भएका न्यूयोर्कस्थित अध्यागमन कानुन व्यवसायी बासु फुलारासँग खसोखासका प्रधान सम्पादक किशोर पन्थीले विशेष संवाद गरेका छन्। अमेरिकामा बसोबास गर्ने नेपाली समुदायका लागि यो जानकारी अत्यन्त उपयोगी र समयसापेक्ष मानिएको छ।
– द टन न्युज डेस्क
