द टन न्युज, काठमाडौं। प्रहरी महानिरीक्षकको निर्देशनमा गुण्डागर्दीविरुद्ध जारी अपरेसनअन्तर्गत काठमाडौंमा सक्रिय सानुभाइ भनिने युवराज गुरुङसहित १८ जनालाई पक्राउ गरिएको छ।
जिल्ला प्रहरी परिसर काठमाडौंका एसएसपी रमेश थापाका अनुसार, गएराति सामाखुसीबाट सानुभाइलाई पक्राउ गरिएको हो। शुक्रवार रातिदेखि प्रहरीले काठमाडौंमा गुण्डागर्दीविरुद्ध विशेष अपरेसन सञ्चालन गरेको थियो। प्रारम्भिक अनुसन्धान अनुसार १७ जनालाई नियन्त्रणमा लिइएको र आवश्यक कारबाही जारी रहेको छ।
पक्राउ परेका सानुभाइ नुवाकोटको ककनी गाउँपालिका–५ घर भएका हुन् र हाल टोखा स्थित सुर्यदर्शन हाइटमा बस्दै आएका छन्। उनी ३३ वर्षका छन् र विगतमा पटक–पटक पक्राउ परेपछि छुटेका पनि थिए।
स्रोतका अनुसार सानुभाइ कुमार श्रेष्ठ ‘घैँटे’का सहयोगी हुन्। कुमार ‘घैँटे’ प्रहरी इन्काउन्टरमा मारिएका थिए। ‘घैँटे’को मृत्युपछि सानुभाइ बुलेटप्रुफ ज्याकेट लगाएर हिँड्ने गरेका थिए। यो उनको आठौं पटक पक्राउ भएको घटना हो। हाल उनी जेलमा रहेका समिरमान सिंह बस्नेतसँग निकट मानिन्छन्।
२०७२ मा नुवाकोटमा हतियार सहित पक्राउ पर्दा उनलाई पनि बुलेटप्रुफ ज्याकेटमा भेटिएको थियो। सो वर्ष पुसमा प्रहरीले उनलाई हातहतियार तथा खरखजाना मुद्दामा अनुसन्धान गरेको थियो।
यस घटनाले काठमाडौंमा गुण्डागर्दीविरुद्ध प्रहरीले निरन्तर कारबाही गर्दै आएको र सुरक्षा निकायहरूको सतर्कता उच्च रहेको देखाएको छ।
