उज्यालो नेपाल पार्टी सोलुखुम्बुबाट प्रतिनिधित्व गर्दै समानुपातिक उम्मेदवार ल्हाक्पा फुटी शेर्पा ज्युले सोलु–काठमाडौं सम्पर्क समिति गठन गरेसँगै आफ्नो चुनावी अभियानलाई थप सशक्त र संगठित बनाउनु भएको छ। पार्टीका नेता–कार्यकर्ता तथा समर्थकहरूको उत्साहजनक उपस्थितिमा सम्पन्न कार्यक्रमले सोलुखुम्बुवासीबीच नयाँ ऊर्जा र आशा थपिएको बताइएको छ।
सम्पर्क समिति गठनसँगै शेर्पा ज्युले सोलुखुम्बु जिल्लाबासी आम मतदाता ज्युहरूमा यही फागुन २१ गते हुने प्रतिनिधिसभा निर्वाचनमा प्रत्यक्षतर्फ “चिम” र समानुपातिकतर्फ “बासुँरी” चिन्हमा मतदान गरी उज्यालो नेपालको अभियानलाई सफल पारिदिन हार्दिक अपिल गर्नु भएको छ। उहाँले आफ्नो उम्मेदवारीलाई सोलुखुम्बुको समग्र विकास, रोजगारी सिर्जना, शिक्षा–स्वास्थ्य सुधार र पर्यटन प्रवर्द्धनसँग जोड्दै दृढ प्रतिबद्धता व्यक्त गर्नुभयो।
उहाँले भन्नुभयो, “सोलुखुम्बु केवल हिमालको पहिचान होइन, सम्भावनाको अथाह भण्डार हो। अब विकासका ठूला योजना, युवा उद्यमशीलता र महिला सशक्तीकरणलाई प्राथमिकतामा राख्दै जिल्लालाई समृद्धिको मार्गमा अघि बढाउने समय आएको छ।”
कार्यक्रममा उपस्थित स्थानीय अगुवा, बुद्धिजीवी तथा युवाहरूले शेर्पा ज्युको नेतृत्वमा उज्यालो नेपाल पार्टीले वैकल्पिक र स्वच्छ राजनीति स्थापित गर्ने विश्वास व्यक्त गरेका थिए।
सोलुखुम्बु–काठमाडौं सम्पर्क समिति गठनले राजधानीमा रहेका सोलुखुम्बुवासीबीच संगठनात्मक एकता मजबुत बनाउने र निर्वाचनमा उल्लेखनीय समर्थन जुटाउने विश्वास लिइएको छ। चुनावी माहोल तातेका बेला शेर्पा ज्युको सक्रियता र स्पष्ट एजेण्डाले सोलुखुम्बुमा नयाँ राजनीतिक तरंग सिर्जना गरेको छ।
