बेलायतमा साकेला उभौली पर्व भव्य रूपमा सम्पन्न
किरात राई यायोक्खा यूके को गरिमामय आयोजनामा गत शनिबार (२३ मे २०२६) बेलायतस्थित ग्याम्बल्स लेनको किरात हाउसमा प्रकृतिपूजक महान् चाड साकेला उभौली पर्व भव्य तथा सानन्द रूपमा सम्पन्न भएको छ।
कार्यक्रममा बेलायतका विभिन्न क्षेत्रबाट किरात समुदायका सदस्यहरू, समाजसेवी, बुद्धिजीवी, युवा तथा महिला सहभागिहरूको उल्लेखनीय उपस्थिति रहेको थियो। परम्परागत किराती भेषभूषामा सजिएका सहभागीहरूले सामूहिक रूपमा साकेला सिली नृत्य प्रस्तुत गर्दै आफ्नो मौलिक संस्कृति, परम्परा तथा पहिचानलाई जीवन्त बनाएका थिए।
उक्त अवसरमा वक्ताहरूले साकेला उभौली पर्वले प्रकृतिप्रति सम्मान, सहअस्तित्व, आपसी एकता तथा सांस्कृतिक संरक्षणको सन्देश दिने उल्लेख गर्दै विदेशमा रहेर पनि आफ्नो मौलिक संस्कृतिलाई जगेर्ना गर्दै आएकोमा किरात राई यायोक्खा यूकेको प्रशंसा गरेका थिए।
कार्यक्रममा सांस्कृतिक प्रस्तुति, शुभकामना आदानप्रदान तथा सामूहिक भेटघाटले विशेष रौनक थपेको थियो। सहभागीहरूले बेलायतमा रहेर पनि नेपाली तथा किराती संस्कृतिको संरक्षण र प्रवर्द्धनमा यस्ता कार्यक्रमले महत्वपूर्ण भूमिका खेल्ने बताएका थिए।
साकेला उभौली पर्व सफलतापूर्वक सम्पन्न भएकोमा आयोजक संस्थाप्रति सहभागीहरूले धन्यवाद व्यक्त गर्दै आगामी दिनहरूमा पनि यस्ता सांस्कृतिक कार्यक्रमलाई निरन्तरता दिनुपर्ने धारणा राखेका थिए।
