रास्वपालाई पहिलो दल बनाउन जापानबाटै युवाहरू नेपाल फर्किए
काठमाडौँ — आगामी निर्वाचनलाई लक्षित गर्दै राष्ट्रिय स्वतन्त्र पार्टी (रास्वपा) लाई पहिलो दल बनाउने उद्देश्यका साथ जापानमा रहेका नेपाली युवाहरू स्वदेश फर्किन थालेका छन्। विदेशमा बस्दै आएका युवाहरूले प्रत्यक्ष रूपमा चुनावी अभियानमा सहभागी हुन नेपाल आएको बताएका छन्।
यस क्रममा युवा व्यवसायी केशव अधिकारी लगायतका युवाहरू पनि जापानबाट नेपाल पुगेका छन्। उनीहरूले परिवर्तन, सुशासन र पारदर्शिताको एजेन्डासहित रास्वपाको अभियानलाई सशक्त बनाउन आफूहरू मैदानमा उत्रिएको जनाएका छन्।
जापानमा अध्ययन, रोजगारी तथा व्यवसाय गरिरहेका नेपाली युवाहरूले सामाजिक सञ्जालमार्फत समेत आफ्नो उपस्थितिको जानकारी दिँदै नयाँ राजनीतिक संस्कार स्थापित गर्न सक्रिय भूमिका खेल्ने प्रतिबद्धता व्यक्त गरेका छन्।
रास्वपाले विदेशमा रहेका युवासमेत स्वदेश फर्केर अभियानमा जोडिनु पार्टीप्रति बढ्दो विश्वासको संकेत भएको प्रतिक्रिया दिएको छ। पार्टी स्रोतका अनुसार विभिन्न देशबाट युवाहरू नेपाल फर्किने क्रम अझै जारी रहेको छ।
