समानुपातिक सांसद मन्त्री नबन्ने संकेत : रवि लामिछाने–बालेन्द्र साह सहमतिमा रास्वपाको तयारी
काठमाडौँ । राष्ट्रिय स्वतन्त्र पार्टी (रास्वपा) ले समानुपातिकतर्फबाट निर्वाचित सांसदलाई मन्त्री नबनाउने तयारी गरेको छ। पार्टी सभापति रवि लामिछाने र वरिष्ठ नेता बालेन्द्र साहबीच भएको समझदारीअनुसार यस्तो रणनीति बनाइएको बताइएको छ।
स्रोतका अनुसार रास्वपाले प्रत्यक्ष निर्वाचनमार्फत जनताबाट सिधा जनादेश पाएका सांसदहरूलाई प्राथमिकता दिँदै मन्त्री चयन गर्ने आन्तरिक तयारी गरिरहेको छ। यसलाई पारदर्शिता, जनउत्तरदायित्व र जनमतको सम्मानका रूपमा व्याख्या गरिएको छ।
पार्टीभित्र समानुपातिक प्रणालीको महत्त्वलाई अस्वीकार नगरे पनि कार्यकारी जिम्मेवारीमा प्रत्यक्ष निर्वाचित प्रतिनिधिलाई अघि सार्ने सोचका साथ यो निर्णयतर्फ अघि बढिएको जनाइएको छ। यस कदमले सरकार सञ्चालनमा जनताको प्रत्यक्ष सहभागिता र विश्वास अझ मजबुत हुने अपेक्षा गरिएको छ।
यद्यपि, यस विषयमा औपचारिक निर्णय भने सार्वजनिक भइसकेको छैन। पार्टीका शीर्ष नेताहरूबीच छलफल जारी रहेको र अन्तिम निर्णय छिट्टै सार्वजनिक हुने स्रोतले जनाएको छ।
राजनीतिक विश्लेषकहरूले रास्वपाको यो सम्भावित निर्णयलाई नयाँ राजनीतिक अभ्यासको संकेतका रूपमा हेरेका छन्, जसले अन्य दलहरूमा समेत बहस सिर्जना गर्ने अनुमान गरिएको छ।
