अर्जुननरसिंह केसीको स्वास्थ्य अवस्था सामान्य, शुभेच्छुकप्रति जगदीश्वर नरसिंह केसीको आभार
काठमाडौं । नेपाली कांग्रेसका प्रभावशाली नेता जगदीश्वर नरसिंह केसी ले वरिष्ठ राजनीतिज्ञ तथा आफ्ना दाजु अर्जुननरसिंह केसी को स्वास्थ्य अवस्थाबारे चासो र शुभकामना व्यक्त गर्ने सम्पूर्णप्रति हार्दिक आभार व्यक्त गरेका छन्।
सामाजिक सञ्जालमार्फत प्रतिक्रिया दिँदै केसीले अर्जुननरसिंह केसीको स्वास्थ्य अवस्था अहिले सामान्य र सुधारोन्मुख रहेको जानकारी दिएका छन्। उनले स्वास्थ्य लाभको कामना गर्दै फोन, सन्देश तथा विभिन्न माध्यमबाट शुभेच्छा व्यक्त गर्ने सबैप्रति कृतज्ञता व्यक्त गरेका छन्।
केसीले आफ्नो सन्देशमा भनेका छन् कि परम पूजनीय दाजु अर्जुननरसिंह केसीको स्वास्थ्य लाभको कामना गर्ने सम्पूर्ण शुभेच्छुक, साथीभाइ, राजनीतिक सहकर्मी तथा शुभचिन्तकहरूप्रति हार्दिक आभार व्यक्त गर्दछु। उहाँको स्वास्थ्य अवस्था अहिले सामान्य र राम्रो रहेको छ।
अर्जुननरसिंह केसी नेपाली राजनीतिमा लामो समयदेखि सक्रिय रहँदै आएका अनुभवी नेताका रूपमा परिचित छन्। उनको स्वास्थ्य अवस्थाबारे चासो व्यक्त गर्दै देश तथा विदेशबाट शुभेच्छा आउने क्रम जारी रहेको थियो।
स्वास्थ्य अवस्था सामान्य रहेको जानकारी सार्वजनिक भएपछि उनका समर्थक, शुभेच्छुक तथा राजनीतिक वृत्तमा राहतको अनुभूति भएको छ। जगदीश्वर नरसिंह केसीले आगामी दिनमा पनि सबैको सद्भाव, माया र शुभेच्छाको अपेक्षा रहेको बताएका छन्।
