सोलुखुम्बु — हिमालको काखमा बसेको वीरता, साहस र स्वाभिमानको भूमि सोलुखुम्बु यतिबेला ऐतिहासिक निर्णयको संघारमा उभिएको छ। विकास, पारदर्शिता र समृद्धिको नयाँ यात्राका लागि सोलुखुम्बुबासीले अब दृढ संकल्प गर्नुपर्ने समय आएको भन्दै उज्यालो नेपाल पार्टी का उम्मेदवारले भावुक अपिल गर्नुभएको छ।
“मेरो जित व्यक्तिगत महत्वाकांक्षा होइन, यो सोलुखुम्बुका किसान, युवा, मजदुर, आमा–दिदीबहिनी र सम्पूर्ण आम जनताको जित हो,” उहाँले भन्नुभयो, “यदि म विजयी भएँ भने त्यो विजय सिंगो जिल्लाको सम्मान र भविष्यको आधार बन्नेछ।”
उम्मेदवारले सोलुखुम्बुको पर्यटन, शिक्षा, स्वास्थ्य, सडक तथा पूर्वाधार विकासलाई प्राथमिकतामा राख्दै दीर्घकालीन योजना ल्याउने प्रतिबद्धता व्यक्त गर्नुभयो। विश्वको सर्वोच्च शिखर सगरमाथा बोकेको जिल्लामा अझै पनि आधारभूत आवश्यकताका लागि संघर्ष गर्नुपरेको यथार्थप्रति दुःख व्यक्त गर्दै उहाँले अब परिवर्तनको नेतृत्व सोलुखुम्बुबासी आफैंले लिनुपर्ने धारणा राख्नुभयो।
“हामीले अब अरूको भर पर्नु पर्दैन। हाम्रो शक्ति, हाम्रो मत र हाम्रो एकताले सोलुखुम्बुको भाग्य बदल्न सक्छ,” उहाँले थप्नुभयो।
उम्मेदवारले युवाहरूलाई रोजगारीका अवसर सिर्जना गर्ने, पर्यटन प्रवर्द्धनमार्फत स्थानीय आम्दानी बढाउने, कृषिमा आधुनिकीकरण ल्याउने र दुर्गम बस्तीमा स्वास्थ्य सेवा विस्तार गर्ने स्पष्ट योजना सार्वजनिक गर्नुभएको छ। उहाँले सोलुखुम्बुको आवाज संघीय संसदसम्म सशक्त रूपमा पु¥याउने प्रतिबद्धता जनाउनुभयो।
भावुक अपिल गर्दै उहाँले भन्नुभयो, “सोलुखुम्बुको प्रत्येक मत भनेको विकासको पक्षमा उठेको हात हो। उज्यालो भविष्यका लागि, आफ्ना सन्तानको राम्रो शिक्षाका लागि, सुरक्षित र समृद्ध गाउँ–शहरका लागि—यसपटक सही निर्णय गरौं।”
आगामी निर्वाचनलाई सोलुखुम्बुको भविष्य निर्माण गर्ने अवसरका रूपमा लिँदै उज्यालो नेपाल पार्टी का उम्मेदवारले सम्पूर्ण मतदातासमक्ष एकताबद्ध भई उज्यालो यात्रामा साथ दिन हार्दिक अनुरोध गर्नुभएको छ।
“सोलुखुम्बुबाट उज्यालो नेपाल पार्टीको उम्मेदवारले जित्नु भनेको सोलुखुम्बुका जनताले जित्नु हो,” भन्ने सन्देश अहिले जिल्लाभर भावनात्मक नाराका रूपमा गुञ्जिरहेको छ।
