विनय यादव : मधेशबाट उदाउँदै गरेको युवा पुस्ताको प्रतिनिधित्व
नेपाली कांग्रेसको १५औँ महाधिवेशनमा २४ वर्षीय युवा नेता विनय कुमार यादव (अधिकारी) ले केन्द्रीय सदस्य (युवा) पदमा उम्मेदवारी दिने घोषणा गरेका छन्। सिरहा क्षेत्र नम्बर–४ बाट ३५ वर्षमुनिको युवा समूहअन्तर्गत महाधिवेशन प्रतिनिधिमा निर्वाचित यादवले पार्टीको केन्द्रीय नेतृत्वमा युवा पुस्ताको प्रतिनिधित्व स्थापित गर्ने उद्देश्यसहित आफ्नो उम्मेदवारी अघि सारेका हुन्।
मधेशबाट कांग्रेसको केन्द्रीय नेतृत्वमा युवा पुस्ताको आवाजलाई बलियो रूपमा प्रस्तुत गर्ने लक्ष्य राखेका यादव नेपाल विद्यार्थी संघबाट राजनीतिक यात्रा सुरु गरेका युवा नेता हुन्। उनी २०७४ सालमा नेविसंघको सचिव पदमा निर्वाचित हुँदै सक्रिय राजनीतिमा प्रवेश गरेका थिए।
राजनीतिसँगै सामाजिक तथा व्यावसायिक क्षेत्रमा समेत सक्रिय यादवको उम्मेदवारीलाई कांग्रेसभित्र युवा पुस्ताको सहभागिता र पुस्तान्तरणको बहससँग जोडेर हेरिएको छ। गोलबजारमा व्यवसाय सञ्चालन गर्दै आएका यादवले संगठनलाई थप सक्रिय, समावेशी र युवामैत्री बनाउने विषयलाई आफ्नो राजनीतिक यात्राको महत्वपूर्ण पक्षका रूपमा अघि सारेका छन्।
मधेशको युवा पुस्ताबाट केन्द्रीय सदस्यको उम्मेदवार बनेका यादवले महाधिवेशन प्रतिनिधिहरूसँगको संवाद र आफ्नो राजनीतिक एजेन्डामार्फत समर्थन जुटाउने अभियान अघि बढाएका छन्। उनको उम्मेदवारीले कांग्रेसको १५औँ महाधिवेशनमा युवा नेतृत्व र पुस्तान्तरणको मुद्दालाई थप चर्चामा ल्याएको छ।
