द टन न्युज , काठमाडौं — श्रम संस्कृति पार्टीले आफ्नो संसदीय दलको नेतामा अध्यक्ष हर्क साम्पाङलाई चयन गरेको छ। पार्टीको संसदीय दलको बैठकले सर्वसम्मत निर्णय गर्दै साम्पाङलाई उक्त जिम्मेवारी सुम्पिएको हो।
पार्टीभित्र श्रम, पारदर्शिता र जनमुखी राजनीति स्थापना गर्ने अभियानमा अग्रसर रहँदै आएका साम्पाङलाई संसदीय दलको नेतृत्व दिनु सकारात्मक कदमका रूपमा हेरिएको छ। बैठकमा सहभागी नेताहरूले साम्पाङको नेतृत्वमा संसदमा पार्टीको भूमिका अझ प्रभावकारी हुने विश्वास व्यक्त गरेका छन्।
संसदीय दलको नेतामा चयन भएसँगै साम्पाङले जनताको अपेक्षा अनुसार काम गर्ने प्रतिबद्धता व्यक्त गरेका छन्। उनले संसदमा श्रमिक वर्गको आवाज सशक्त रूपमा उठाउने, सुशासन र विकासका मुद्दालाई प्राथमिकतामा राख्ने बताए।
पार्टीले आगामी दिनमा संसदभित्र र बाहिर सशक्त उपस्थिति जनाउने लक्ष्य लिएको जनाएको छ। हर्क साम्पाङको नेतृत्वमा श्रम संस्कृति पार्टीले नयाँ ऊर्जा र स्पष्ट दिशा पाउने विश्वास गरिएको छ।
