काठमाडौं–२ – काठमाडौँ निर्वाचन क्षेत्र नं. २ मा जारी घरदैलो अभियानमा उल्लेखनीय उत्साह देखिएको छ। उम्मेदवार मणिराम फुयालले विभिन्न टोल–बस्तीमा पुगेर मतदातासँग प्रत्यक्ष भेटघाट गर्दै आफ्ना एजेन्डा प्रस्तुत गरिरहँदा स्थानीयबासीको उल्लेखनीय सहभागिता देखिएको छ।
घरदैलो कार्यक्रममा युवादेखि ज्येष्ठ नागरिकसम्मको सक्रिय उपस्थिति रहेको टोलीले जनाएको छ। मतदाताहरूले विकास, सुशासन, रोजगारी सिर्जना, शिक्षा–स्वास्थ्य सुधार र स्थानीय पूर्वाधार विस्तारका विषयमा चासो राख्दै फुयालसँग प्रत्यक्ष संवाद गरेका छन्।
फुयालले काठमाडौँ–२ लाई व्यवस्थित, सुरक्षित र अवसरयुक्त क्षेत्र बनाउने प्रतिबद्धता दोहोर्याउँदै “जनताको सम्मान र विश्वास नै मेरो सबैभन्दा ठूलो शक्ति हो” बताएका छन्। उनले आगामी निर्वाचनमा सूर्य चिन्हमा मतदान गरी विजयी गराउन अपिल गरेका छन्।
स्थानीय बासिन्दाहरूले परिवर्तन र परिणाममुखी नेतृत्वको अपेक्षा व्यक्त गर्दै उत्साहजनक समर्थन जनाइरहेका छन्। अभियान टोलीका अनुसार काठमाडौँ–२ मा दिनप्रतिदिन जनलहर बढ्दो क्रममा रहेको दाबी गरिएको छ।
निर्वाचन नजिकिँदै जाँदा काठमाडौँ–२ मा राजनीतिक गतिविधि थप सक्रिय बन्दै गएको छ। घरदैलो अभियानले मतदातासँग प्रत्यक्ष सम्बन्ध मजबुत बनाएको भन्दै समर्थकहरूले यसपटक “सूर्यमै मतदान” सुनिश्चित हुने विश्वास व्यक्त गरेका छन्।
