सोलुखुम्बु — उज्यालो नेपाल पार्टीका तर्फबाट उम्मेदवार पेम्बा छिरी शेर्पाले सोलुखुम्बुमा घरदैलो कार्यक्रमलाई तीव्र बनाउँदै पार्टी संगठन विस्तारमा विशेष जोड दिएका छन्।
उम्मेदवार शेर्पाका अनुसार पछिल्लो एक हप्तामा विभिन्न वडामा सञ्चालन गरिएको भेटघाट, छलफल तथा घरदैलो अभियानका क्रममा सयौं स्थानीय नागरिक पार्टीमा प्रवेश गरेका छन्। उनले स्थानीय विकास, युवाको रोजगारी र पारदर्शी नेतृत्वलाई प्राथमिकता दिँदै जनताको विश्वास जित्ने अभियान अघि बढाइएको बताएका छन्।
घरदैलो कार्यक्रममा स्थानीय बासिन्दासँग प्रत्यक्ष संवाद गर्दै समस्या, सुझाव र अपेक्षाबारे जानकारी संकलन गरिएको पार्टी स्रोतले जनाएको छ। पार्टीका स्थानीय नेताहरूले अभियानलाई अझ व्यापक बनाउँदै आगामी दिनमा थप जनसहभागिता बढाउने योजना रहेको बताएका छन्।
यसैबीच, आगामी निर्वाचनलाई लक्षित गर्दै उम्मेदवार शेर्पाले जनताको समर्थन र सहभागिताले पार्टीलाई सोलुखुम्बुमा बलियो बनाउने विश्वास व्यक्त गरेका छन्।
