योगेश भट्टराईको व्यंग्यात्मक टिप्पणी : “बस बचाएको दाबी गर्ने बुढाको कथा सम्झिएँ”
काठमाडौं । नेकपा (एमाले) का उपमहासचिव Yogesh Bhattarai ले सामाजिक सञ्जालमार्फत एक व्यंग्यात्मक टिप्पणी सार्वजनिक गर्दै पुरानो राजनीतिक प्रसंगसँग जोडिएको कथा स्मरण गरेका छन्।
भट्टराईले आफ्नो स्टाटसमा नेकपा एमालेको सातौँ राष्ट्रिय महाधिवेशनको बन्दसत्रमा एक वरिष्ठ नेताले सुनाएको कथा उल्लेख गरेका छन्। कथामा बसभित्र उभिएको एक वृद्धले यात्राभर बसको फलामे डन्डी समातेर बसलाई पल्टिनबाट जोगाएको दाबी गरे पनि वास्तविकतामा बस आफ्नै गतिमा गन्तव्यमा पुगेको प्रसंग समेटिएको छ।
उक्त कथा स्मरण गर्दै भट्टराईले “आज मलाई यो कथाको खुब सम्झना भयो” भन्दै छोटो टिप्पणी गरेका छन्। यद्यपि उनले आफ्नो टिप्पणी कुनै व्यक्ति वा घटनाप्रति लक्षित हो भन्ने स्पष्ट उल्लेख गरेका छैनन्।
उनको स्टाटसलाई राजनीतिक वृत्तमा पछिल्लो समसामयिक घटनाक्रम र विभिन्न नेताहरूले आफूलाई उपलब्धिको मुख्य श्रेय दिन खोज्ने प्रवृत्तिमाथिको व्यंग्यका रूपमा हेरिएको छ। सामाजिक सञ्जालमा पनि भट्टराईको उक्त टिप्पणीलाई लिएर विभिन्न प्रतिक्रिया आइरहेका छन्।
राजनीतिक विश्लेषकहरूका अनुसार भट्टराईले प्रस्तुत गरेको कथाले सामूहिक प्रयासबाट प्राप्त उपलब्धिलाई व्यक्तिगत योगदानका रूपमा प्रस्तुत गर्ने प्रवृत्तिप्रति संकेत गरेको बुझाइ व्यक्त गरेका छन्।
