सान फ्रान्सिस्कोस्थित नेपाली वाणिज्य दूतावास बन्द गर्ने निर्णयप्रति प्रवासी नेपालीको तीव्र असन्तुष्टि
क्यालिफोर्निया, अमेरिका — सान फ्रान्सिस्कोस्थित नेपाली वाणिज्य दूतावास बन्द गर्ने नेपाल सरकारको निर्णयप्रति अमेरिकामा बसोबास गर्ने नेपाली समुदायबाट तीव्र असन्तुष्टि व्यक्त गरिएको छ। विशेषगरी बे एरियामा रहेका नेपालीहरूले उक्त निर्णयलाई “दूरदृष्टिविहीन” र “समुदायको आवश्यकतामाथिको बेवास्ता” भन्दै आलोचना गरेका छन्।
सान फ्रान्सिस्को निवासी प्रितेश कार्कीले सामाजिक सञ्जालमार्फत आफ्नो आक्रोश व्यक्त गर्दै सरकारको निर्णयप्रति कडा टिप्पणी गरेका छन्। उनले लेखेका छन्, “हजारौं नेपालीको सेवा, सुरक्षा र नेपालसँगको भावनात्मक सम्बन्ध जोड्ने केन्द्रका रूपमा रहेको वाणिज्य दूतावास बन्द गर्नु अत्यन्तै दुःखद र अव्यावहारिक निर्णय हो।”
उनले वर्तमान सरकारमाथि “पपुलिस्ट शैलीमा पुराना संरचना भत्काउने प्रयास” गरेको आरोप लगाउँदै यस्ता निर्णयले प्रवासी नेपालीको विश्वास कमजोर बनाउने बताएका छन्। “जनताको सुविधा र दीर्घकालीन आवश्यकताभन्दा राजनीतिक प्रचार र क्षणिक लोकप्रियता प्राथमिकतामा परेको देखिन्छ,” उनले उल्लेख गरेका छन्।
बे एरियामा ठूलो संख्यामा नेपाली समुदाय बसोबास गर्दै आएको छ। राहदानी नवीकरण, कानुनी कागजात प्रमाणीकरण, आपतकालीन सहायता तथा विभिन्न कन्सुलर सेवाका लागि सान फ्रान्सिस्कोस्थित कार्यालय महत्वपूर्ण केन्द्र मानिँदै आएको थियो। कार्यालय बन्द भएपछि सेवाग्राहीहरूलाई थप दूरी, खर्च र झन्झट व्यहोर्नुपर्ने चिन्ता समुदायले व्यक्त गरेको छ।
प्रवासी नेपाली समुदायका विभिन्न सदस्यहरूले सरकारलाई उक्त निर्णय पुनर्विचार गर्न आग्रह गरेका छन्। उनीहरूले विदेशमा रहेका नेपालीको आवश्यकता, योगदान र संवेदनशीलतालाई ध्यानमा राखेर निर्णय लिनुपर्ने बताएका छन्।
प्रितेश कार्कीले अन्त्यमा सरकारलाई “जनताको आवाज सुन्न” आग्रह गर्दै विदेशमा रहेका नेपालीहरूलाई राज्यले उपेक्षा गर्न नहुने धारणा व्यक्त गरेका छन्।
